تويت
نصائح التحضير سواء الإمتحانات أو مباريات التوظيف أو الماستر
علاقة بكيفية التحضير سواء الامتحانات أو لمباريات التوظيف أو الماستر، من خلال تجربتي المتواضعة استنتجت بأن النجاح سواء في الدراسة أو في الوظيفة العمومية يحتم على الطالب التحلي بالخطوات التالية:
1- إلى بغيتي التيسير فحياتك كلها و متعيش الشقاء حسن علاقتك مع الله و كون قريب منو " فَمَنِ اتَّبَعَ هُدَايَ فَلَا يَضِلُّ وَلَا يَشْقَىٰ .. "
2- كون مرضي بزاااف مع واليديك وعمرك تعارض كلامهم حقاش حتى سخط الواليدين كيسبب الشقاء فحياة الإنسان وقد صدق عيسى عليه السلام عندما قال "وَبَرًّا بِوَالِدَتِي وَلَمْ يَجْعَلْنِي جَبَّارًا شَقِيًّا "
3- عيش فهاد الحياة و انت مآمن بالقضاء والقدر وآمن بأن الرزق للي مكتبو ليك الله عارف عنوانك و يستحيل أنه يمشي لشيحد غيرك إلى آمنتي بهاذ القاعدة الكونية غادي تعيش مرتاح وقانع بدكشي للي عطاك الله و لعل حذيث " عجبا لأمر المؤمن كله خير " يغني عن البيان.
4- التفاؤل ثم التفاؤل ثم التفاؤل واخا يتسدو بيبان الدنيا كاملة فوجهك بقا متفائل أنا عند ظن عبدي بي، إن خيرا فخير، وإن شرا فشر "
5- ثق فالقدرات ديالك وعمرك تبخص الكفاءة ديالك، وقوي عزيمتك يعني الى درتي شيحاجة بين عينيك خاصك توصل ليها سوا فشهر سوا فعام سوا فعشر سنين لمهم خاصك توصل، عمرك تنزل يدك و تقول عيت.
6- هادي خودها مني ڭرانتي والله ومتكون تبغي الخير للناس ولصحابك للي قراو معاك لانتا طفرتيه، خللي قلبك بيض والى نجح صاحبك ونتا لا متحسدوش بالعكس فرح ليه، وكون مأكد الخير للي غادي تبغيه لصاحبك غادي يعطيك ربي الأضعاف ديالو
هادشي للي كتبت الفوق كيشكل 70% من أسباب النجاح، وهادو هما الركائز الى معندكش واخا تقرا ليل نهار مدير والو، ودابا غادي نشير للأمور العملية المتعلقة بكيفية التحضير والتعامل مع الإختبارات المهنية والجامعية :
7- مللي تكون بصدد اجتياز امتحان سواء تعلق بمباراة الماستر او التوظيف، حاول متكونش عشوائي فالتحضير، غير كتقرا غير هكداك وقتما قالها لك راسك و بدون برنامج محكم، المنتخب الوطني استعدادا لمونديال روسيا غادي يدير معسكر تدريبي و ممكن يكون مقفل وعلاش هدشي كلو باش يضبطو الأمور مزيان و التركيز يرتفع، نفس الشيئ بالنسبة ليك حتا انت، وبالتالي نسطر جدول زمني محكم فيه اوقات الدراسة اوقات الاستجمام اوقات النوم ونعلقو حدا راسي و نجعلو من النظام العام.
8- الهاتف ديالك الذكي خلليه يرجع غبي باش تكون انت أذكى منه، يعني بعد من الفايس بوك و الواتساب... و متقولش نبقا خدام غير بتيليفوني و منذخلش لمواقع التواصل والله متقدر حقاش هاد العالم ولينا مدمنين عليه وغادي يضيع ليك وقتك بزاف و يشتت ليك التركيز، عبد ربه بصدد تحضيري لمباريات التوظيف خدمت بنوكيا بيل مدة ديال 3 أشهر و حسيت بواحد الراحة كبيرة والتركيز ديالي ولا قوي بزاف.
9- " تعلم من أين تؤكل الكتف " يعني متنزلش على الكتاب من ألفه الى يائه، هكدا غادي ضيع الوقت بزاف خصوصا اذا كان وقت التحضير ضيق، وبعد من الحفاظة راه القرآن وحده الذي يحفظ عن ظهر قلب، وللي فهمتيها معمرها تنسى ليك.
10- انتقي المراجع بعناية فائقة يعيني نرجع للمراجع الدسمة ماشي نراجع فاي كان خصوصا وان بعض الأساتذة ولاو تجار الكتب القانونية خاصهم غير يبيعو " كور و عطي لعور ".
11- من بعد ما نختار المرجع للي غادي نحظر فيه ومن الأحسن ميكونش مرجع للي كبير بزاف و الوقت مكيسمحش ليك، مثلا تحظير مادة ق.ل.ع فمرجع العلامة الاستاذ السنهوري او فالأسرة نحظر فكتاب الاستاذ الكشبور و انا عندي غير 10 ايام ميمكنش !! وبالتالي يكفي مرجع متوسط الحجم مثلا فالاسرة مرجع الأستاذ الشافعي، و للي أساسي وضروري منو هو "الكود" ديما يكون فجنبي هو بمثابة النبراس الذي يضيئ لك الطريق وحاول ضبط المواد القانونية مكنقولكش حفظها ولكن على الأقل نعرف كل محور منين كيبدا وفين كيسالي مثلا الأوامر الاستعجالية لرئيس المحكمة ( من 149 - 154 ق.م.م ) للي خلاني نركز على هاد المسألة هو أنك مللي كتكلم وكتستدل بالنصوص كيعرفوك ضابط وكتقيم الحجة على كلامك وفمباراة الشفوي بالمالية قالها لي رئيس اللجنة قالي : "أحي فيك ملكة الإستشهاد بالنصوص القانونية حافظ عليها ".
12- فيما يتعلق بالتحرير اول حاجة المنهجية الى معندكش عرف راسك كتخوي الما فالرملة، وبالتالي نتعلم نزل الموضوع ديالي فمنهجية محكمة، اول حاجة نقرا السؤال و نتمعن فيه مزيان و نفكو لأسئلة فرعية باش نفهم مزيان اشنو مطلوب مني، من بعد دوك الاسئلة الفرعية غادي تستشف منها تقسيم للموضوع وبزاف كيلقاو مشكلة فالتقسيم. و نحاول نحرص على جمالية ورقة التحرير ونحاول تجنب "البلونكو".
13- خير الكلام ما قل و دل، يعني نحاول غالبا منفوتش ورقة تحرير واحدة يعني أربع صفحات، باش ميتعبش المصحح و هو كيقرا، و تكون مركزة و غنية بالمعلومات، و بلغة سليمة من الأخطاء الإملائية القاتلة، و نستعمل أسلوب يعبر عن مستوى طالب جامعي و مصطلحات رنانة حتى لا يمل المصحح من القراءة.
14- التدبير المحكم للوقت.
15- وبخصوص الاختبارات الشفوية، نآمن بقدراتي، ونتيق فراسي بزاف، ومترتبكش ونتا لذاخل عند اللجنة، قبل مذخل بعد من داك الكولوار للي كيكون حدا باب اللجنة وشي غادي شي جاي فحالة مراتو كتولد وعاد هو قالك بغا يراجع " الحولي مكيسمانش نهار العيد "، ومللي اذخل ابتسم فوجه اللجنة وجمع التركيز ديالك ودير فبالك بللي هادوك للي واقف قدامهم راهم غير بنادم وماشي بالضرورة غادي يكونو قارين احسن منك ( سألت فاختبار شفوي للتوظيف بوزارة الفلاحة عن مستجدات م.الأسرة قلت الوصية الواجبة هو يقولي واحد هادي اول مرة نسمعها بقيت معاه 5 الدقايق و انا نشرح لو بالدارجة عاد فهمها ) خلاصة القول استبسط داك المقام للي نتا فيه و مذخموش فعقلك باش متستريساش. و اي سؤال طرح عليك جاوب واخا متكونش عارف حاول تجتهد و ترجع للقواعد العامة، سؤلت فاختبار شفوي حول قانون الصفقات العمومية، معرفتش الجواب و قلت ليهم ( على الرغم من اني تخصص ق.خاص الا أنني سوف أجتهد و آمل بأن تعملو بالحذيث القدسي الذي يقول من اجتهد و اصاب فله اجران و من لم يصب فله أجر. وإني أراكم لمن المحسنين ) ولليت مللي كنجتهد و كنخطأ كيقولو لي عندك أجر والى جاوبت صح كيقولولي اجران و كلشي شابع ضحك.
#حقق_الله_مبتغاكم.
بقلم الطالب : Luise Med