تويت
نصائح لطلبة القانون الجدد من اجل التفوق الدراسي :
- خاص الطالب يبدا المراجعة من بداية السومستر (الفصل) وميخلي لكور يتجمع عليه حتا لخر حيث عندو 7 مواد وكل مادة فيها شحال، وهذ النصيحة هي أهم نصيحة وكلما بدا الطالب المراجعة بكري كلما كانت النتيجة أفضل فالنهاية.
- بخصوص الطلبة لي عندهم الامكانات المادية حسن يشرو المقررات والمطبوعات من بداية الدورة ويبداو يراجعو فيهم ويلخصو فيهم وهذ الطريقة أيضا من أهم أسباب النجاح.
- بخصوص الطلبة لي كيحضرو المحاضرات كنصحكم بضرورة الانتباه فالمحاضرة لأن الأستاذ يقدر يشير لموضوع أو أسئلة الإمتحان وبالنسبة للطلبة لي كيبغو يتفاعلو ويسولو الأستاذ على شي حاجة مافهموهاش كنصحهم يكلسو في الصفوف لي في القدام بش يشوفهم الأستاذ وحتا إلى سولوه يكون سامعهم.
- أهم نصيحة للطلبة خصهم يخدمو نماذج الإمتحانات لقدام ديال الأساتذة لي عندهم خصوصا الأساتذة لي كيديرو إمتحان على شكل كسم لـن الطالب أولا كياخذ فكرة على الإمتحان وشنو خصو يراجع وثانيا كاين بعض الأساتذة لي كيعاود شي أسئلة من الإمتحانات القدام أو كيطرحوا الأسئلة بتعبير أخر فقط .
- إلى كان الأستاذ كيدير فالامتحان أسئلة أو موضوع يمكن للطالب ألي حضر كل الحصص يعتمد على المحاضرات صافي بشرط يكون كتب كل نقط المهمة لي طرق لها الأستاذ، أما ‘لى كان الامتحان على شكل كسم فضروري لكور ديال الأستاذ لأنه كتكون فيه شي جزئيات كتحط فالامتحان.
- ضرورة الكتابة خص أي طالب يكون عندو دفتر أو دفترين كيكتب فيه المحاضرات وكيرتبهم أو كيلخص لأن المعلومة ملي كتكتبها بنفسك كتزيد ترسخ.
- ضرورة التعاون بين الطلبة كاين طلبة مغيجو حتا لشهر 10 أو من بعد ويمكن تكون عندهم ضروف خاصة وإلى طلبوك الطالب لي كتحضر المحاضرات بلا متعزهم عليهم وعطيهم ليهم يفوطوهم وعرف بلي كيف عاونتيهم غيسهل عليك الله فالامتحان.
- غتسمعو كلام بأن الأستاذ الفلاني قاصح مكيعطي نقطة هو صحيح كاين اساتذة مقصحين فالتنقيط لكن عطا الله الطلبة لي كيفاليدو عندهم والى خدمت مزيان عندو غيعطيك النقطة مزيانة غير ركز وفهم السؤال قبل ما تجاوب.
- ضرورة تنويع أماكن المراجعة يعني مرة تراجع فمكتبة الجامعة ومرة فشي مستنبت أو حديقة ومرة فدار بش متحس بالملل.
- ضرورة تنويع المواد يعني تراجع فنهار مادتين أو ثلاثة أو اكثر حسب قدرة كل طالب أما إلى بقا الطالب مع مادة نهار كامل أكيد غيجيه الملل.
نصائح حول طريقة المراجعة لأصحاب القانون:
- الى كان الاستاذ غيحط الامتحان على شكل qcm فضروري تشري الكور ديالو وخا تحضر المحاضرات كملين لانه فكسم غيحط شي جزئيات كاينة فلكور ونتا منتبهتش ليها فالمحاضرة اما الى كان الامتحان على شكل اسئلة او موضوع فيمكن لك كاع متشد الكور بشرط تكون كتبت جميع المحاضرات.
- الى كان الامتحان على شكل موضوع او اسئلة يمكن لك تكتفي بالمحاضرات او تلخص الكور وتكون فاهم اما الى كان الامتحان على شكل qcm فالى لخصت كنصحك متصغرش تلخيص بزاف واي معلومة بانت لك فلكور كتبها لان الكسم كيتحطو فيه معلومات جزئية وحتا ملي تلخص لكور خصك ترجع ليه تقراه واي معلومة بانت لك دزتي عليها خصك تشدها لانها ممكن تحط.
- كاين الطلبة لي تيشد الكور ويبقا يقراه او يكون عندو فيتر ويسطر على المعلومات المهمة وكنصح هظ الطلبة من الاحسن يلخصو ويكتبو دك شي لي قراو لانه بالكتابة كتزيد المعلومة ترسخ ومن بعد ماتلخص لكور وضبطو هديك الساعة عاود قراه جوج مرات ول ثلاثة او اكثر حسب استطاعتك.
- ضروري تخدم نمادج الامتحانات لقدام وتبدا المراجعة من بكري وتبقا تنوع بين المواد باش متملش وملي تراجع تبقا تناقش مع شي طالب عندو نفس الاستاذ لان النقاش كيرسخ المعلومة.
- خص الطالب يراجع من الكور ديال الاستاذ ديالو ماشي من ديال شي استاذ اخر لانه وخا تكون نفس المادة تيكون اختلاف بين الاساتذة.
تعليق